La seconda classificata della Sezione A (poesie in dialetto salentino) per l’anno 2024 è stata la poesia intitolata “Nu scigghiu de arviru” di Marcello Nicoletti, che è stata apprezzata dalla giuria perché “rievoca il tessuto storico-sociale del nostro territorio con immagini ed espressioni popolari che la rendono musicale e piacevole all’ascolto. La riflessione finale è dolorosa, ma apre prospettive di speranza.”.
Ci ìamu cuntàre a ddavèru tuttu de la ulìa,
nu spicciàmmu mancu pe buscrài.
É nu scìgghiu, e ncèra lli tìci Ssignurìa…
pe ddhe tante cose ca nu nde neca mai.
Tante le razze, chiùi de cinquecentu pare:
ogliaròla, favolosa, nocellara, leccinu…
Baroni, duchi, e monaci ca ìanu preàre,
a llu Mediuevu, chiantàra an chìnu.
De annùni stae an terra, dae ricchezza,
e agnàsciu ole tica pace cu tuttu lu core.
St’àrviru ete pròpiu na bellezza,
e li nonni lu ntitulànu Rrè, e Imperatore!
Perciò, àuru ca acchiatùra ca tenìmu;
ete quarcheccòsa ca de sempre ale tantu.
De quanti millenni, precìsu nu sapìmu,
ma serve a ddavèru, e bbè nu uàntu.
É bbituàtu stècia cu sule, acqua e jentu,
e s’hanu mmurtalàti randi e vagnùni,
cu nde ssìstanu milioni a llu Salentu;
tante ìnsite, e puru tanti curmùni.
Na fiàta, cu picca mezzi, e tanta cura,
ogne àrviru nu sacru monumentu era,
e tìa tàccari e ulìe pe l’èju, e salamùra.
Moi, trattenìmu chiànti mmàne e sera…
Ormai su’ comu cundannati a morte.
Ddhe cimàgghie pàrenu manu ntesàte,
ddhe stanghe nnirvecàte, cusì storte
e spinnàte, pàrenu razze sturtijàte.
Sta cangia tuttu a st’ ùrtimi anni.
Curpa de la xylella, ddha brutta malatìa,
ca a mijàre le face siccàre, e su’ danni;
nu se troa nu rimètiu cu lla ccìa!
Speràmu la ulìa cu nu pozza mai sparire.
Mo’ se chiàntanu razze chiù putènti,
e fenca nu rrìa la metecìna pe guarire,
tàmu tièmpu a quìddhi competenti!
